聖誕派對 (24 Dec 2007)

準備多時的平安夜派對終於到啦, 呀Rae訂了一條好大又超抵的三文魚, 並且親自操刀起片, 重有果個椒鹽三文魚頭, 真勁。今日派對有好多嘢食, 包括沙律、壽司、生果、醉雞翼、鮑魚雞湯等等。最令人感動既係有由Vicky媽親自整既鹵水鴨舌同牛舌同埋Wallace媽為我們預備既超好食糯米飯。最令我地最驚喜及讚嘆不已係由Jason嫂Sammi為我地整既Tiramisu, 個賣相真係好似係大酒店買咁, 味道梗係超超超正啦, 相對我那個薄批蛋糕我要繼續努力啦, 好戲在後頭…就係果隻差不多有11磅既大火雞, 第一次親自去焗啦, 都可以接受既, 純粹應下節啦。食飽飽之後首先係抽獎時間, 我們為每一位到來的朋友預備了一份禮物, 當然有實用同攪笑既啦, 跟住玩下遊戲啦, 最後就係到交換禮物時間啦, 又係最剌激的節目, 因為會選出最好同最差的禮物, 今年真係…….好難選….因為低處未算低…..哈哈哈什麼都有…..魚骨型領呔架、多士爐、CD、遮等等, 不過今次被選為最….差就係足球一個。香檳、冰酒、橙酒、連韓國酒都飲埋, 真係好開心。如果年年都能夠同這班好朋友一齊共渡真係太幸福了。真係希望每一個你地都盡慶同開開心心啦…..

北京之旅後記 (這個後記係過左第一日我隨心情而寫)

見到他們第一個感覺係….身處三個不同地方(法國、香港、北京)的舊朋友, 係上一次相聚之後就相約下一次的重聚, 當親眼見到、擁抱他們的那一刻真的感動了。每個人為了這次的重聚, 預備了很多很多…食物、好酒、禮物等等, 感覺好溫馨。特別係每天當我地總係被窩熟睡時, Joyce就已經努力為我們預備早餐, 親手做麵包、Pancake比我地食, 真的感謝他們的熱情款待……..

(北京之旅) 第四天….香港 (2 Dec 2007)

今天又係回家的時候, 早餐後跟他們道別後便起程去機場, 食個拉麵就上機……, 這個旅程好開心。

(北京之旅) 第三天….天安門、故宮、潘家園、朝陽劇場雜技大世界、利群烤鴨店 (2 Dec 2007)

早餐過後又出發去, 哩到北京梗係要遊下景點, 我地第一站去到天安門, 嘩……好多人呀, 唔知係唔係星期日關係呢, 之後就去故宮, 估唔到下一站既潘家園舊貨市場先係最吸引大家既地方, 因為好多古舊既嘢賣, 重要勁講價, 好似我買隻玉龜仔, 開價六佰, 梗係講唔掂啦, 就走啦….當正準備離開市場之際, 有人拍我一下, 原來就係那個賣玉龜仔的女人, 佢問我幾多錢先買, 佢話唔係特登搵我, 只係去洗手間順路經過, 不過佢又即刻從衫袋攞隻玉龜仔出哩, 我地都好好笑…..所以我地買左啦。都肚餓啦..就去對面果間叫「金鴨都」食餃子, 跟住又出發去睇雜技表演, 這個叫朝陽劇場雜技大世界有好多演出, 如軟骨少女、頂缸、彈跳板空中飛人, 等等….真係好精彩..叫人拍爛手掌。趁有時就去左附近既三里屯雅秀時裝市場行一陣。今晚晚飯好似去到一個隱世小店..係因為落車只見牆上劃左隻鴨, 上面則寫上小店英文國語拼音「LI QUN」, 轉左彎先見到另一幅牆上有比較多的介紹…「利群烤鴨店」, 店裡好細, 只見係走廊玻璃上有好多老闆同好多外交官員、名星影既相, 有陳奕迅、容祖兒等等。食物方面真係好好…食, 特別係出名既烤鴨加埋果枝北京既二鍋頭真係最佳享受。

(北京之旅) 第二天….九華山莊、蘭 (1 Dec 2007)

早餐過後就出發去九華山莊浸溫泉, 這個地方都好大, 溫泉池都有好多個, 更有藥用的溫泉浸, 再來一個保健按摩真係最好享受。之後就返屋企食下嘢, 跟住又出發去地道既街市遊一遊, 街市個入口超隱閉, 唔係熟人都唔會識去, 想像唔到這個街市真係又乾淨又多種類賣, 好多賣嘢既人都識講簡單既英人…勁。返歸休息一陣又到晚飯時候啦….路經兩旁都係地道既小店, 真估唔到突然轉個彎會係另一個世界, 好靚既高樓大廈就在眼前, 真係一個好大的對比, 晚餐的地方叫「籣」, 原來大有來頭, 係當代著名的設計大師Philippe Starck的精心杰作, 一入到去真係會比佢既設計吸引住, 晚飯後又過去酒吧那邊飲一杯就回去。

(北京之旅) 第一天…..(30 Nov 2007)

因今次只去四天, 所以就自己就開車到機埸, 準時八點半到達同誠哥匯合, Check-in後就去嘆個早餐先, 經過三個多小時的機程, 一落機已見到有個女仔手上紙上有地三個個名啦, Philippe已安排佢個助理接我們, 真是好週到, 而司機哥哥小李就送我地去Philippe屋企, 唔駛半小時就到達啦, 見到所有好朋友啦…. Philippe、Joyce、Gill 同JoJo, 重識左三個新朋友, 就係呀Gill個家姐Marilyn、姐夫Guy同Philippe個仔仔Mathieu。首先係一輪交換禮物…誠哥送了二套好靚既中空茶壺比呀Gill同Marilyn佢地, 當然要即場試下啦….。休息一陣, 就出去遊車河, Philippe在這裡買了架side-car, 當然要試下啦, 第一站去了一個有好多side-car的地方, 跟住就去了一個小店買下嘢…係時候返歸晚飯啦。這班由法國遠道而來的朋友真是太好….因為佢地帶左好多好食既嘢哩…有生蠔(唔係一隻半隻…..登登登係有九十六隻)、好多枝不同類型既酒、重有芝士、鴨胸、鵝肝等等, 我地都唔失禮…有誠哥精心炮製的鮑魚…正, 重有Joyce為我地預備的燒羊脾(超正)。就在這樣的氣氛中享受一頓豐富的晚餐…

(葛福臨佈道大會) http://www.hkfgf.org (29 Nov 07)

繼十七年前參加過由葛福臨牧師既爸爸葛培理牧師主講既佈道大會之後, 再參加這次一連四日既「香港葛福臨佈道大會」, 因之後要去北京, 所以就只有這一個晚上可以去, 跟好友Daisy晚飯後就沿保良局、南華會進入大球場, 沿路好多人呀….。入到去即見到一大群穿白袍的詩班員坐在台的一邊, 當晚有詩班獻詩、大樂隊伴奏等等, 當然有葛福臨牧師既分享啦, 佢講到聖經新約路加福音19章有關撒該的事情, 最後就到呼召的時間, 好多人走到球埸裡面決志信耶穌, 好快就佈滿指定的區域裡面, 感謝主。