後記

台灣既天氣真係可以用藍天白雲去形容, 雖然有時突然間會落大雨, 開遮都開唔切, 但大多數都係好好既天氣。在墾丁遇到的都是好人好事..讓我留下一個很好的回憶, 好想下一次再來這個美好的地方。相反地, 阿里山給我的感覺實在太差啦, 人同事都係..大家異口同聲講未來十年盡可能都不會再來。但肯定的是….這個六人女子組合好想盡快有下一個一齊再去旅行的機會。

(台灣南部之旅) 第七天….奮起湖/香港 (1 July 2008)

一早就整理好行李, 又係飯店大堂等出發去奮太古道、原始神木群, 突然係休息期間, 先想起我同呀樂係要早走返香港, 我地即刻用九秒九跑返去飯店, 原來司機已經係到搵緊我地啦, 即跳上車…經過差不多四個鐘頭既車程終於到左高雄小港機場。不過我地途經一個叫觸口既地方休息一陣, 呀樂一落車就好快跑左上去吊橋, 原來這裡有兩條橋分別叫「天長」「地久」橋, 又係一個路邊服務站食左一頓都好好食既午餐。去到機場check-in後, 我同呀樂就將身上最後有既台幣都冼清啦…

(台灣南部之旅) 第六天….阿里山觀日/奮起湖 (30 June 2008)

準時凌晨4點10分係飯店等果位帶我地睇日出既陳小姐, 為怕又出事, 我已經係昨晚食飯時已經打電話比佢約定佢, 眼見一車又一車既人上山去, 我地梗係心急啦, 多謝飯店既伯伯幫忙, 不停打電話比陳小姐, 又打電話比蔡生啦, 伯伯同我地講日出時間太約係5點20分, 車程又要45分鐘。最後陳小姐係4點35分出現, 問佢點解遲到, 佢又話唔駛急, 真係比佢激死, 沿途都見個天慢慢光, 上到去已經見到好多人係度等睇日出, 日出真係只有五分鐘時間, 太陽就升左上哩, 大家都話咁辛苦都係值得。之後去左幾個景點影下相..夫妻樹、鹿林神木、姐妹潭、受鎮宮、香林國、神木區、樹林塔、慈雲寺等等。返飯店收拾好所有行李準備出發去奮起湖, 司機叔叔叫葉崑城, 佢真係超攪笑, 成日問D無厘頭既IQ題, 連瞓左覺既我隱約聽到都笑出哩。終於到達啦, 放低行李就去嘆午餐~奮起湖出名既鐵路便當, 不過我個人就覺得嘛嘛地啦(因為配菜重好食過主菜)。準時三時半就係飯店等齊人, 參加由當地人帶領我們出發遊下奮起湖幾個景點..阿祖級火車頭、四方竹、百年車站、百年杜鵑樹、百年梢楠木等等。回到飯店, 有一檔賣生果既貨車停係門口, 我地買左荔枝、芒果同巨峰提子返房食, 真係好好食呀。食完生果又準備食晚飯, 不過就嘛嘛地啦, 最後就大夥兒去嘆下咖啡。

(台灣南部之旅) 第五天….阿里山 (29 June 2008)

呀牛老闆已經一早預備好車比我地出發去嘉義, 但就係我上去叫Vicky同Caris食早餐既時候, Caris話Vicky要返香港先, 因為佢重發緊燒好唔舒服, 我地就第一時間打去航空公司睇下有無最快機位返去啦, 一齊都攪掂曬, 我地因為都要趕去嘉義, 所以都要出發, 因Vicky失聲, 唯有麻煩呀牛老闆如有任何需要聯絡就幫忙一下。經過成三個多鐘頭既車程, 終於到達嘉義火車站, 好快就見到我地參加既阿里山同奮起湖三日兩夜既旅行社聯絡人~蔡生, 佢簡介一下就叫我地自己去食嘉義出名既火雞肉飯, 真係唔錯呀, 準時搭1點半既小火車上阿里山, 小火車真係有好舊的感覺, 搭左差不多四個鐘頭終於到達阿里山。在途中蔡先生打電話比我, 話我地之前訂個間飯店無房, 叫我地住另一間, 重話質數差唔多, 一到步見到好多人舉住個有飯店名既牌係到等, 因我地要先去洗手間, 所以係最後一批人走出火車站, 只剩翻一個哥哥仔攞住個「櫻山大飯店」既牌(即係原本我地訂個間), 原本惡夢就係哩一刻開始, 哥哥仔同我地講成個阿里山既飯店房都滿曬, 佢負責帶我地去民宿, 我地「吓左一聲」, 梗係唔去啦, 我就即刻打比蔡生投訴啦, 收線後哥哥仔又話佢趕住要走(態度勁差個隻), 我梗係叫佢等埋先啦, 不過我地最後決定先去個間所謂民宿睇下先, 因為正正落緊大雨, 又要攞行李上車, 再加上哥哥仔又唔幫手, 真慘。幾分鐘, 車停係一處好似無人既地方, 我團友Rosanna就跟哥哥仔入去睇下, 佢形容民宿既環境真恐怖, 我又要立即打比蔡生, 話我地唔會住個間民宿, 哥哥仔又話佢要走, 最後我地五個人就企係度商量點做, 你知嗎? 我地真係唔會比人「蝦」…姊妹們各自分頭行動, 呀樂同Caris就去睇下其他飯店有無房, 我地就繼續同蔡生講數啦, 最後蔡生安排左一間叫高山青飯店比我地 (可能佢知道唔好「蝦」啦), 放低行李之後, 我地決定先去「櫻山大飯店」睇下係唔係真係無我地訂房既記錄同埋睇下房間幾錢一晚, 果然真係無我地訂房記錄, 價錢就差唔多。最後就去到旅行社安排既山芝鄉風味館食晚飯, 都幾豐富啦..之後就係附近行左一陣就返去休息。

(台灣南部之旅) 第四天…. 墾丁一天遊(船帆石/砂島/鵝鑾鼻/最南點/龍磐公園/風吹砂/茶山吊橋/出火/恆春 (28 June 2008)

今日攞左民宿包左既麥記卷食個靚早餐, 因此昨天食民宿預備既甜腿蛋三文治真係太難食。其餘四位團友Rosanna、Shylock、Caris同Vicky一早會由高雄到墾丁, 大家就在另一間民宿〜牧場旅棧見面啦, 一見到Vicky的病容真係太慘啦..她發燒同失聲, 但暫時仍可繼續行程, 因未能check-in 所以先出去走走。牧場旅棧既呀牛老闆真係好好人, 樣樣都好細心幫我們安排好曬。穿過靜靜既墾丁街去到兩日前同呀樂行過既海灘, 睇哩個四位團友唔鍾意同陽光玩遊戲, 所以好快行完就去食飯啦。去到一間好似叫峇里公主既餐廳食lunch, 不過我就覺得唔太好食囉。跟住就返牧場旅棧check-in, 一入到去間房, 我地都十分興奮, 因為全間房既牆都係牛牛哩, 大部份既擺設都以牛牛為主題, 好似拖鞋、枕頭、厠所門、厠所板等等, 我們當然唔會放過影相留念既機會。因為Vicky同Caris可能太累啦, 所以只有我地四個人出發去墾丁觀光一天遊, 遊墾丁我覺得一定要包車囉(如果超過兩個人), 因為每個景點真係有點遠, 半日就已經遊左八個景點, 好多都係落車影影相就去下一個景點, 最耐都係逗留係鵝鑾鼻燈塔, 不過各有各特色, 最後去左恆春既鴨肉蔡食晚飯, 重叫左佢地最出名既鹹水鴨, 又真係好好食。

(台灣南部之旅) 第三天…. 墾丁/海洋生物博物館(海生館)/恆春 (27 June 2008)

早上準時八點半出發, 坐墾丁街車去海生館, 哩台南旅行最緊要帶學生証(如有既話), 因為好多門票都差不多有半價, 我梗係有啦..因為重係學生嘛, 一入館第一時間去最有興趣既珊瑚王國館, 再去世界水域館, 我地重睇左企鵝表演, 好cute。係館裡面食拉麵就走啦..向恆春出發, 在恆春影左幾張相..熱力真係太逼人..只係食左個豆腐花就返去瞓晏覺, 晚上又出動行夜市, 今晚重多人… 最後係一間叫五十嵐買左杯超好飲既珍珠奶茶同生果就回去啦…

(台灣南部之旅) 第二天….高雄/墾丁 (26 June 2006)

早餐過去, 我們要先去銀行入錢比當地旅行社, 之後就返酒店check-out, 就出發去高雄車站坐巴士去墾丁, 墾丁係一個我好想去既地方, 因為睇左套台劇叫〝我在墾丁〜天氣晴〞真係幾好睇,一去車站就有88號快速公路巴士, 即買即上車, 經過太約兩個多小時, 終於到達墾丁街, 再拖住行李再行一分鐘就到達寧靜海民宿, 環境同房間比我預期中好好多, 休息一陣, 就去墾丁街搵嘢食醫肚, 不過果餐就一般啦, 因為中午時份墾丁既天氣好曬好熱, 我地行左一陣已經頂唔全, 就去左Starbucks嘆咖啡(其實嘆冷氣先真), 見到條街好冷清唔多人, 最後呀樂先返休息下, 我就一個人係墾丁街逛一陣, 返民宿匯合呀樂之後就去行沙灘, 真係水清沙幼, 條海岸線重好長, 不過浪實在太大, 所以無人敢游水只在岸邊玩水, 係墾丁有一樣嘢必須隨身攜帶〜就係遮, 因為隨時會落大雨, 幾分鐘之後又會陽光普照, 今日晚餐去左食牛排..不過麻麻地, 反而個沙律bar既嘢好食得多, 食飽飽之後再去逛夜市, 一走出餐廳大門口, 見到成街都係人, 同中午時份真係天淵之別, 原來墾丁就係咁既。

(台灣南部之旅) 第一天….…..香港/高雄 (25 June 2008)

今次係我自己第一次獨自搭飛機去第二度, 心情好緊張(真遜), 真係貴人出門招風雨, 呀樂出發果日已經有颱風出現,不過佢同我講佢應該可以預期上機, 而我聽日上機就難講囉, 真的, 我上機前一晚十點幾真係掛8號風球, 無計啦, 明天再算, 因為搭晨早九點機, 所以一起身六點就即刻上網睇下班機有無delay或cancel囉, 又唔見有, 又怕網上資料唔update, 又打去航空公司check下, 但電話又打唔通, 唯有繼續梳洗準備出發去機場, 出面天氣真係好差, 落緊好大雨, 好彩有Daniel送我去機場, 但他相信8號風球加上惡劣既天氣, 我的飛機不能起飛, 最後我再試試打去航空公司check下, 最後確定航班預期出發, 去到機場人頭湧湧, 真不敢相信出面真係掛緊8號風球。

經過個多小時飛機已經到達高雄小港機場, 藍天白雲, 同香港既天氣真係相差太遠, 因為同一時間有幾個旅行到達, 所以辨台証都攪左一段時間, 攞行李、出海關就去唱台幣, 本來想搭捷運, 但人生路不熟又攞住個大行李箱, 所以就搭的士匯合呀樂。得我地兩個人, 所以沒有特別計劃去邊, 只去睇下愛河同六合夜市。因為明天一早要去墾丁, 所以先去車站睇下巴士時間表。之後呀樂想搭高鐵, 就先搭捷運由高雄火車站去左營站, 再坐高鐵由左營站去台南站, 原來台南高鐵站距離市區幾遠, 不過有免費接駁車去市區, 我地就去左台灣都幾出名既度小月食午餐, 真係幾好味, 食完再返高雄睇愛河, 不過我就覺得一般靚啦。好戲在後頭〜六合夜市, 真係好多台南地道小吃, 麻辣臭豆腐、新疆串燒、條食街又唔算太長, 所以最後都要食翻碗新竹米粉填下肚仔先返去休息。

台灣南部之旅~前記

今次六人女子組合一齊去台南旅行真係第一次, 其中Rosanna同Caris係第一次踏足台灣, 首先呀樂會係24號先出發去高雄, 我自己就25號獨自出發, 其他人就會係28號出發。因為我地係墾丁都係住民宿, 所以參考過好多網友既意見, 我同呀樂既3日2夜就住係墾丁既寧靜海, 等其他人到齊就住係牧場旅棧渡過在墾丁的一晚, 最後就參加左台灣當地旅行社既3日2夜阿里山〜奮起湖之旅。今次旅行既組合真係天衣無縫, 因為不同性格特性既人都集中在這個旅程裡面, 有爛gap王、有十十、有為食王等等。

後記

峇里同新加坡兩個地方我都係第一次去, 峇里我最鐘意玩激流…最靚係Chapel, 而新加坡樣樣都好好食….真係難忍口….又肥左幾磅啦….

(峇里、新加坡之旅) 第八天…. 新加坡/香港 (30 Mar 2008)

哩到旅程既最後一日…一起身就去到附近既松發肉骨茶食lunch, 都ok好食啦, 之後坐MRT由Clarke Quay 去Dhoby Ghaut再轉去Orchard , 有好多酒店同大型shopping mall 係Orchard Road兩旁, 因要趕時間去機場…所以無時候行啦…。真係唔該曬Pat姐…送我地去機場。

(峇里、新加坡之旅) 第七天…. 聖淘沙 (29 Mar 2008)

今天Chris既朋友Pat姐會帶我地去遊聖淘沙同埋食新加坡好食既嘢, 第一站去到328加東叻沙(我就係一個勁鐘意食叻沙既人)…原來叻沙既原產地就係係加東, 真係好正宗..完全同香港唔同, 我連湯都飲埋, 如果唔係要留肚食其他嘢, 我想我再食一碗。下一個行程就係去由細細個已經成日聽既名……聖淘沙(Sentosa), 我地搭Cable Car 去影獅子頭, 再搭Sentosa Express 由 Imbiah Station 去 Beach Station, 啱啱今日係星期六, 所以都好多人, 好靚既沙灘…我地就搵左間舖頭飲下啤酒食下pizza休息下, 個pizza又係超正…。我地又搭去Sentosa Station 行街街, 黃昏時候我地去左Pat姐朋友係Pasir Panjang Food Centre開既香蕉叶燒烤海鮮食嘢, 好多嘢食..有黑胡椒蟹、燒魔鬼魚、螺..樣樣都好好味, 重有果杯唔似庶水既庶水, 真係食到抱住個肚。下一站就係去Mount Faber Park行, 亦係其中一間特別餐廳珠寶盒(The Jewel Box)既所在地, 另外我地見到最特別係有吊車餐廳, 有情侶會係行緊既吊車上共進一頓晚餐, 服務員會不斷按時送上各樣食物, 真係好特別。又係食嘢既時間…又哩到出名食豆腐花舖頭叫梧槽豆花油條, 真係好滑既豆腐花…超正。係時候買下手信啦…去到又係好出名既林志源….知唔知賣什麼東東? 就係賣牛肉乾、豬肉乾既舖頭, 好多人排隊…反而香港有既美珍香..好似拍烏蠅咁, 食飽飽就行吓牛車水夜市..都係同香港既廟街差唔多, 最後一站就去到食榴槤….我好似係第二次試食…不過都係頂唔順, 飲飽食醉返去啦……

(峇里、新加坡之旅) 第六天…. 峇里/新加坡 (28 Mar 2008)

今天搭朝早9:15分飛機, 經過太約2個半鐘頭飛機…終於到達新加坡, 第一個感覺好舒服同乾淨, 再搭的士去Uncle住的既地方…我地都會住係度..。第一站去牛車水美食街(即Chinatown food street)食嘢..點知大部份舖頭都未開, 就改去文東記小吃食海南雞飯, 真係好好食呀..食飽飽後就周圍行…去左好出名既榴槤同噴水獅子影相。今晚約左呀De既大家姐同姐夫去East Coast Seafood Centre入面既無招牌(No Signboard Seafood)食飯, 我地點左最出名既白胡椒蟹..個蟹鉗好大隻..好好食。

(峇里、新加坡之旅) 第五天…. 烏布(Ubud)激流/努沙杜瓦(Nusa Dua) (27 Mar 2008)

今日去左玩激流(SOBEK White Water Rafting), 我第一次玩..所以都係參加個一般勁既先。搭左個半鐘車程又去到烏布既Rafting Starting Point, 著上一身裝備後就出發…沿石級行左差不多五分鐘落到去就見到一隻隻既橡皮艇啦…先由專人講解基本要留意既嘢..就上船啦, 好興奮呀因為真係想像唔到會點??會唔會跌落水呢?? 一開始不久就先遇到一個流…我就由個位跣左入艇(哈哈!), 沿途風景好靚, 最好玩係我地不斷追前面一隻由四個澳洲人+一個識講廣東話既當地guide既艇, 佢地好好玩…我地互相撥水..我地又發揮中國人打不死的精神不停追, 我就係一個不留神的時候就比個guide拉左落水, 當然無事啦..如果下次有機會再玩我一定玩過勁level既, 係過程中突然見到有個外國人衝緊過哩, 我地即刻伸個漿比佢..河水都好急…最後上左我地架艇..再過返佢自己架艇。玩完後就係河邊有lunch buffet食, 差不多12:30pm就起程去買定今晚party既酒同零食。再由酒店出發去Nusa Dua去玩飛魚(Fly Fish)..點知係填好form之際, 有個陌生人同我地講, 佢地玩既時候根本玩唔足時間..即搵笨囉..所以放棄唔玩。之後再去Fish Market食嘢…點知個Fish Market係無嘢食… 我地就問下當地人…點知佢帶埋我地去…不過間餐廳唔係好掂..所以淨係食左個炒飯同飲左冬蔭功湯即走……返酒店游水…突然行雷閃電…即閃啦。晚餐去左呀De今晚住既Pat-Mase Villas入面食, 因為今晚會係度開Party…今晚真係玩得好開心…玩到零晨1點先走…

(峇里、新加坡之旅) 第四天…. De & Coolie Wedding Party - infinity chapel (Conrad Bali Resort & Spa) (26 Mar 2008)

終於到左今次峇里之旅既最終目的…就係出席呀De同Coolie既結婚典禮, 不過新郎哥提醒我地不要太早到, 因為怕撞到新娘子…所以我地大部份親朋戚友都住係另一間酒店。Daniel今約左兩個印尼friend 見面, Chris、Rosan同我就去左酒店附近既Bali Collection行街買手信。準時2點鐘所有住係Novotel酒店既親朋戚友都係Lobby等, 你知嗎?..原來有成十幾個人..包括雙方家長、新娘子哥哥、新郎哥大家姐同二家姐、新娘子既中學大學同學等等。 一到達Conrad, 我地所有人……就安排留係一間房裡面等….大家都屏息以待…(原來新娘子就係隔離房化緊妝), 突然新郎哥一身causal wear出現係我地面前, 真比佢嚇襯, 原來佢同我地講新娘子已經知道左啦…不過佢唔知有幾多人哩左…。由房門走出去就見到個超靚wedding chapel, 真係睇相同親眼見到真係好唔同, 時候差不多, 我地所有人就坐定定等, 終於見新郎哥先步入小教堂, 再見到新娘子由爸爸拖住步入, 真係令人太太太感動啦… 新娘子好似好緊張咁…原本佢話要忍住怕會湧出眼淚, 但我們有些人都忍唔住流了淚…因為眼前這個情境真係令人太感動啦, 我見到新娘子既爸爸亦偷偷抹眼淚。一邊望住新娘子Coolie步入一邊聽住live band唱住歌, 每一個都享受著這份難以形容的心情, 雖然係短短半小時的婚禮, 但實在使人永遠難忘。之後就係青草地上切結婚蛋糕…影吓相。之後先返酒店休息一陣同換件衫再去參加wedding banquet, 真開心因為今晚認識左新娘子幾個好朋友。

(峇里、新加坡之旅) 第三天….烏布(Ubud) (25 Mar 2008)

今日大家分道揚鏕, 男既Go Diving、女既Go Shopping。去行街街之前join 左個睇海豚既tour, 晨早6:00am食早餐..6:45am就出發, 坐左太約半個鐘頭車到碼頭, 眼前的海真係好靚好舒服..重有好多靚遊艇, 出發啦…玩左成個鐘頭海盜船..先去到睇海豚既地方, 不過真係值得…因為從未見過有咁多海豚jump哩jump去…船既領隊不停吹口哨叫佢地…又真係好似幾得咁..不過淨係睇左太約半個鐘..就返去啦..。之後就搭的士去烏布shopping啦…落車既地方就係Monkey Forest, 不過我地無入去睇, 哩度好多特色既舖頭, Rosan重帶左兩隻長頸鹿返屋企添, 累啦…就搵間比較似樣既餐廳lunch, 坐落先知間餐廳旅遊書都有介紹..叫Three Monkeys…我地坐果個位重係旅遊書影出哩同一個位…哈哈超攪笑。行左一陣街後…又見到有間食店又好多人食..原來又係出名既烤豬店叫Warung Ibu Oka, 好多當地人同遊客都排隊食..我地梗係唔會放過啦…菜單淨係有印尼文..唯有手指指人地嗰d啦…成功..一籃Nasi Babi Guling係面前..唔..d烤豬真係好好食。太約3點幾就搭車返酒店匯合兩位男仕, 今晚去左一間Bumbu Bali食正統既峇里式美食, 我就覺得一般啦..最好食反而係最後既甜品囉, 係我地食飽準備走既時候…隔離枱有個日本女仔主動同我地傾計, 不過佢似乎淨係識講日文…就係數分鐘內我地合照左同攞埋佢email……,佢一個人哩參加潛水course..。因為我地趕時候返酒店做spa…所以唯有再聯絡啦..。個spa真係嘛嘛地..最攪笑係第一次steam係係個好似箱既嘢而唔係去steam room。今日好早休息因為明天就係呀De同Coolie既結婚大日子。

(峇里、新加坡之旅) 第二天….庫塔(Kuta)/海神廟(Tanah Lot) (24 Mar 2008)

早餐過後就出發庫塔, 之前睇書好似係最多嘢睇既地方….但我都覺得個沙灘又多垃圾, 賣既嘢又唔多啱睇…之後食完個lunch就周圍再行吓, 見到有腳底按摩..就去鬆一鬆, 再起行去海神廟(Tanah Lot)睇吓啦, 車程都有些遠….加上一到達又落大雨囉…真掃興, 不過行吓行吓見到眼前就出現海神廟..又真係幾靚。今日晚飯去左金巴蘭(Jimbaran)海邊食海鮮, 都ok好食啦…

(峇里、新加坡之旅) 第一天….…..香港/新加坡/峇里 (23 Mar 2008)

朝早6點就要出發去機場啦 ….因為搭8點飛機囉。經過差不多4個鐘頭飛機到左新加坡機場再等4個幾鐘頭轉機去峇里, 不過機場既Terminal 3 真係好多嘢行同食..首先食左粒好似雪米糍物體既嘢..味道就嘛嘛地啦, 跟住食吓點心..再叫杯smoothies飲, 之後係一間鞋舖一次過掃左3對鞋…yeah..。之後搭Skytrain過左去Terminal 2轉機去峇里…又係時間食吓嘢啦…食左個超正pizza同嘆杯啤酒, 行行吓就係哩個時候撞到呀De既媽媽同大家姐一家…佢地係搭遲我地一班機係香港出發….。上機啦….又經過2個幾鐘頭飛機終於到左峇里啦…一踏出機場就見到落緊大雨…即刻搵的士返酒店, 哩度d司機大佬就係咁家啦…比埋地址佢睇都係錯….我地住既Novotel係同一區就有3間…oh no…所以又要再轉一次的士去啱個間, 一齊攪掂後就係酒店食dinner…..不過d嘢食就真係嘛嘛地啦..

峇里、新加坡之旅~前記

今次都係一次好難忘的旅行…係因參加一對好朋友呀De同Coolie係峇里既婚禮 , 最好玩係新娘子係唔知今次旅行係結婚, 新郎哥真係用心良苦….因為想比個surprise新娘子, 呃佢去影結婚相…..所以之前唔可以係Coolie面前提起去峇里既事…..又唔可以搭同一班飛機..怕撞到, 以為真係一個完美既計劃…但就係結婚之前一天….新娘子起疑心了….最後新郎哥只有坦白從寬….但新娘子不知道有什麼人會出現係婚禮中…….欲知後事如何, 請繼續….睇啦…

(番禺之旅) 第二天….…彿山石灣/香港.(7 Mar 2008)

一早我地又先到餐廳食個靚早餐, 個杯咖啡真係好正, 之後就出發去彿山搵蔡先生啦, 首先去新石灣睇陶瓷, 大家都買到小小嘢啦…再去醫醫肚, 真係食到好多特別既食物..好似…什麼蛇湯、超正既筍殼魚等等。食飽飽又去公仔街行下, 今次大家都有好多收穫….傍晚時就一齊坐巴士返深圳..便各自回家啦…

(番禺之旅) 第一天….…..香港/蓮花港(7 Mar 2008)

我們真是兵分幾路, 海、陸、空都有….我們一行七人就搭下午1時50分船, 由中港碼頭出發去番禺（蓮花港）, 經過差不多兩個小時就到達啦, 司機哥哥已經等緊我地啦…之後先到酒店放底行李, 再出發去今晚晚宴的地方, 我都係第一次踏足番禺這個地方, 感覺好好, 地方又乾淨..不過空氣就..差d囉。晚宴的地方就係莫先生開既餐廳….明珠西餐酒廊, 我地好榮幸可以參觀下佢地個廚房, 真係好整齊同乾淨, 重可以親眼睇到師傅整蛋糕添, 好快趣就整到個花花出哩。我地一共二十七人坐係一張好長好長既枱度,一邊傾計一邊享受豐富既晚餐, 真係太好啦….頭盤、沙律、湯、主菜(羊扒同牛扒)、甜品….太豐富啦…又好好食。最精彩的時候又到啦…就玩新郎新娘..你知嗎? 最厲害係佢地係答問題環節真是太令人意想不到, 如問下對方最鍾意食什麼生果, 最鍾意既顏色等等, 佢地都唔駛想下, 就即刻答到。時間差不多我地就返酒店休息啦..

(番禺之旅) - 前記

今次既短程trip純粹係私人宴會性質, 成班朋友曾經係2005年一齊楂四驅車, 來回香港同雲南一圈, 共同渡過左12日的艱苦旅程, 大家約定今天聚首一堂…見見面同埋商討一下今年的行程。另一件事情…就是我地既莫先生..已經係舊年年底結左婚啦…今天我地就一齊分享下佢地既開心快樂…

後記

係新年返大陸旅行都幾好, 因大部份人都返左鄉下過年, 街上好少人好舒服, 連馬路車都特別少, 雖然好多店舖都無開,但感覺都好好…可能重點係睇景。成班朋友一齊旅行真係會增進不少感情, 真係一個好難得的機會..

(四川之旅) 第八天….成都/香港 (13 Feb 2008)

今天決定放棄在酒店食早餐, 因準備去錦鯉街勁食小食, 由大門口一入去就見到Starbucks Coffee, 門口好有中國的特色, 兩旁都係賣特產的小店舖, 轉入另一條街就係小食街, 真係好多嘢食, 好似竹筒飯、肥腸粉、醬爆肉丸等等, 人人買些少一齊試, 之後Daniel同我就去左Starbucks嘆吓咖啡睇書。之後再集合去對面一間聽講係香港人開既酒樓食飯, 我地好似包左成間酒樓, 因就只有我們兩圍人食飯, 午餐後便起行去機場。

(四川之旅) 第七天….樂山大佛 (12 Feb 2008)

早餐後就出發去樂山大佛同峨嵋山, 旅遊巴突然在高速公路上爆軚(只爆一條外軚), 唯有捱到去一個休息站, 要等救援車哩修理, 好彩剛剛有一個賣茶葉同手信的地方叫天福茗茶, 一坐就個幾鐘, 走時個個一袋袋手信帶走, 疑為攪掂…原來又要捱去搵車房再整, 點知車房又無工具又唔掂, 我們提議唔食午餐先直駛去樂山大佛景區先, 擾攘一輪, 最後我們決定不去峨嵋山, 因時間實在不夠, 淨去樂山大佛, 落車後我們先到一間門面似樣既鄧強飯店吃午餐, 再坐船睇大佛, 不過只是離遠睇無行上去, 司機哥哥就襯這段時間將車修好。傍晚時份就回酒店, 休息一陣又出去食飯, 便各自逛逛街, 原來最辛苦係截的士, 周圍都爭的士…好似比賽咁, 有些團友就行返去算吧。

(四川之旅) 第六天….卧龍/成都 (11 Feb 2008)

早餐後就沿巴朗山(最高海拔4532米)出發去卧龍睇國寶熊貓, 沿山都見到一片好靚既雲海, 而午餐就係路上一間叫九妹酒家食, 經過一陣子既車程就到臥龍熊貓自然保護區, , D熊貓真係超可愛又攪笑, Daniel捐左500蚊就可以同其一隻熊貓仔一齊影下相, 真係一個難得既機會, 入去同熊貓仔影相時, 工作人員要為你做好預備程序, 穿保護衣、用消毒藥抹手, 至於我…因有些怕怕…所以只有離遠合照啦。行行下見到一個榮譽榜, 一望見到Tony Leung個名, 原來梁朝偉都有捐款養熊貓。太約7時返到入成都..先到一間皇城老媽打邊爐同睇表演, 因今餐開始不用吃團餐啦…那變面既表演真係太精彩啦…回都酒店(就係第一晚住個間)實在太好多, 雖不是最高級的酒店, 但各樣的設備暖氣、熱水等等都有..我們都好滿足啦….

(四川之旅) 第五天….四姑娘山 (10 Feb 2008)

早餐既時候就聽到好多投訴, 原來不單只無水, 連暖氣、厠所水又無, 有些房既暖顫又唔掂, 大部份人根本凍都無覺瞓, 不過都係無辦法解決, 因所有房已滿無得換, 原來酒店每天都要等水車哩先有水供應, 所以一係早上有水一係夜晚有水供應, 可能係跟團啦…吃的團餐都係嘛嘛地….早餐又吃杯麵啦….。又出發到四姑娘山雙橋溝坐觀光車遊了幾個景點…眼望布達拉峰、盆景灘、攆魚壩等等, 眼見面前的風景先明白幾辛苦都係值得的。午餐又返去酒店食, D嘢食又出奇地OK…再出發去長坪溝, 本來大家一心想步行入去, 但一見到好多馬在門口時…..最後所有人都騎馬….沿路眼到大姑娘、二姑娘、三姑娘同四姑娘山, 行行下突然要落馬行一段路, 因為有些路有冰面, 怕太滑…危險, 當去到一處好靚的灘時大家興奮起來, 因為實在太靚啦…。回酒店後, Tony同權哥即時去探路搵地方食飯, 因…..今天大家已決定不吃團餐啦。休息一陣司機哥哥就送我們都一個好似民宿的地方, 落車後就見到火光熊熊…原來燒緊已預訂既羊….(不過當地既羊一般都係瘦瘦的), 等左好耐都未有得食, 所以先點左d炒菜食下先, 第一隻羊燒好, 但好似食得既肉好少, 所以再點了多一隻羊…但最後因不夠時間燒…最後變了明天早餐, 我們因太肚餓, 所以就走入廚房幫手煮埋一份, 因只一個爐所以連雞都要攞去另一度煮, 雖然只係夠小小填飽個肚, 但氣氛真係好溫馨的…。

(四川之旅) 第四天….新都橋、四姑娘山 (9 Feb 2008)

因為天氣好凍而酒店亦只有暖顫供應,再加上高山症反應(頭痛)的出現, 所以大部份團友都睡得不太好。酒店對面就有好多一間一間好有特色既藏式民居, 第一站去到塔公寺廟參觀, 山上全都插上色彩繽紛的旗, 好似話祈福咁嘅意思, 離開時見到一群似禿鷹既物體圍圈飛, 我地估可能進行緊天葬。又經過一段很長的車程就到午餐的地方~古堡大酒店, 不過食既嘢就嘛嘛地啦。跟住去到甲居藏寨景區參觀, 眼前一座一座的雕樓真係好特色, 有位穿上傳統嘉絨藏族女仔做我地既導遊, 介紹一下他們族的資料, 然後問我地有無興趣入去其中一間民居參觀下, 酒水及酥油餅任食每位十元, 淨參觀都要五元。我地決定入去…不過最後因民居主人不在…擾攘一陣..又沒有入去又離開啦..又起行往四姑娘山出發。又經過很長的車程終於到達嘉絨大酒店, 放下行李先到酒店附近的地方逛一逛, 買了幾個杯麵便返去食晚飯, 今天開始要吃杯麵啦…因為D饍食真係嘛嘛嘛嘛地啦, 而D員工又淨係識唱歌….。因今年天氣較以往的凍, 所以酒店都要限時限刻提供熱水, 而朝早竟然是沒有水供應…。所以所有人晚飯後立即先衝回房沖涼, 點知…就只有熱水供應, 但無涷水供應, 即熱到熟左。

(四川之旅) 第三天…. 海螺溝/康定/新都橋 (8 Feb 2008)

早餐過後又出發進入冰川, 今日氣溫明顯低左, 坐觀光車去四號營地睇冰川, 我地要係雪地上行太約一公里到達索道站, 都有些辛苦因為我地係二千幾米海拔區, 路兩旁既樹全舖上雪真係好有意景。終於到達2號冰川啦.. 海拔最低點3640米, 再步行去到1號冰川, 眼前全是景象真係好壯觀….。回到酒店食完邊爐午餐經康定再向有攝影天堂之稱既新都橋出發…沿途經過一個地方叫康巴第一關~折多山口, 海拔有成4298米, 車再繼續沿山路上, 最高去到4525米。傍晚時份終於到達新都橋鑫泰酒店, 先將行李搬上房間, 只行上2樓已不斷氣喘, 不是身子差, 只係在海拔高就會出現這種情況, 休息一陣就無事。晚飯後, 我地買了個好大既生日蛋糕同Maggie全叔慶祝生日。

(四川之旅) 第二天….海螺溝 (7 Feb 2008)

早餐過後就出發去海螺溝, 今日天氣都不太好..有小小雨咁…連我咁唔怕凍既人都要著最少四件衫先掂, 重有頸巾、手套、冷帽、暖蛋等等既重裝備。經成雅高速抵達雨城雅安, 因車程比較遠, 所以係車既時間都好多, 所以大家都有備而來, 想得到既零食同乾糧都應有盡有。午餐通常在路上既小鄉鎮食, 今日去到一間叫宴會廳食, 係四川食既嘢一般唔係辣椒就係麻辣, 對我地唔係好食得辣既人哩講, 真係有些難頂。不過在路邊買既水果真係好甜好好食, 午餐後又匆匆出發, 突然旅遊車停係路上, 原來要裝雪鏈, 我地所有人即刻走落車係雪地玩同影相, 擾攘左太約大半個鐘又出發啦, 第一個景點可以話係二郎山隧道(國內最長既公路隧道, 全長 4176公尺)…既入口處, 白白既雪一路一路落係地上..好靚。影下相又起行啦….

終於到達海螺溝冰川森林公園….再坐觀光車去到今晚住既雪域溫泉假日酒店, 因今年四川特別凍, 煤供應太緊張所以我地住既地方有時無熱水同暖氣供應, 有時D餸由廚房送到我地面前都凍曬, 所以要食得好快。今晚既節目係去浸露天溫泉….都好正, 最好笑係酒店無熱水供應, 但係溫泉裡面有超熱巴既熱水無限供應, 由酒店去溫泉只行幾分鐘路程可以有咁大分別。嘆完溫泉再去食火鍋真係太正啦…因明天開始慢慢進入比較高海拔的地區, 所以早早就休息啦..

(四川之旅) 第一天…香港/成都(6 Feb 2008年三十晚)

今次不用司機楊先生載我地啦, 因為Tony既女兒車我地去機場。到達後陸陸續續見到各圑友, 今次一行二十幾人而且大部份都係識, 真係太好玩啦, 今次搭Hong Kong Express要去 Terminal 2 check in, 又快又少人。食左小小嘢就上機啦, 經過兩個幾鐘頭機就到達第一次踏足既成都雙流機場, 一出閘就見到當地導遊小蒲及司機陳師傅, 到達酒店都差不多六點幾, 當地溫度太約6-8度, 比香港凍少少啦。今晚係酒店食團年飯。

四川之旅~前記

今次自己組團參加四川當地一個叫海螺溝、丹巴、四姑娘山(純玩,騎馬,浪漫五天遊), 係旅行前超忙交功課, 根本未有時間上網睇下四川之資料, 聽團友講當地好凍, 氣溫低至零下二十幾度, 我自己真係未試過咁凍, 香港近來又凍都飛起, 所有暖包又被人掃曬, 好彩有些存貨啦, 在出發前又非常好彩買到勁羽絨同一對可抵禦零下二十幾度既Columbia鞋, 因今次會經過最高既海拔地區, 所以出發前已開始食紅景天, 萬事俱備…準備出發啦